اخبار الساعة - خاص
رغم انه صرت اكره الفيسبوك والنشر فيه ... لكن في جزئيتين وحقيقتين كان ضروري ان اكتب عليهم
الحقيقه الاولى
الزعيم قوي بنفسه وفوق كذا معه مؤيدين واتباع بل وحتى متشيعين ومؤمنين كمان بلا
حساب واقوياء كمان لا احنا قله ولا مستضعفين
ولن يغير من هذه الحقيقه الاخبار الكاذبه المتداوله
الزعيم مش محاصر ولا تحت الاقامه الجبريه ويتحرك بكل حريه و من ابوه اصلا يحاصره ولا يفرض عليه اقامه جبريه هذا اسمه عفاش مش الدنبوع
وفي ايضا شوية مؤتمريين فاقدين الثقة بانفسهم اصلا وضعاف عشان كذا خايفين ومرعوبين ويحاولوا يعمموا حالتهم هذي على الجميع وبعضهم قده يدور من يفرع عليه ويدور يتحالف مع علي محسن ومع الاصلاح لانه اصلا فاقد للثقه بنفسه الى درجة انه قده يدور يتحالف مع الي فلتو غرف نومهم وفحطوا ما صمدوش حتى ايام وهربوا ما حتى حد زعل عليهم ولولا السعوديه وحلفها ما كان حتى حد بيذكر اسمائهم
الزعيم محبيه ومؤيديه واتباعه في كل قريه وكل حاره وكل زغط واغلبيه كمان ... محناش محتاجين حد ولا محتاجين تحالف خارجي ولا حتى محتاجين نحشد في حالة حصول اي حرب او معركه ...
الحقيقه الثانيه
الي لازم يفهمها الجميع ان المؤتمر ما عيقرحها ولا عيكون البادئ في اشعال شرارة حرب لا تبقي ولا تذر داخل مدينه تكتض بملايين الساكنين معظمهم نساء واطفال وسببا في سفك دمائهم
والاهم انه ما يمكن يغامر بمصير البلد وبالتسبب في انهيار الجبهات بسبب مناصب وتقاسمات في دوله منهاره وكلها مشاكل واصلا ما حاربنا عليها وهي دوله تقط المسمار
علي عبدالله صالح وقد فجروه بكله
هو وكل رفاقه واسرته واركان حكمه في داخل المسجد وفي ناس كثير يومها اعتبروا تصرفه ضعف وخوف ..وشفنا بعدين كيف ان الي قرحوها هم الضعاف وجا من يهينهم ويدخل بيوتهم في ايام وما حتى دافعوا على غرف نومهم
بالنسبه للحوثيين خلوهم يقرحوها لو يشتوو
على دمار البلد ودمارهم هم قبلنا كلنا كمان محد بيقدر يلفلفها لو قرحت لا احنا ولا هم
ولو قرحوها يا مؤتمريين انتم اغلبيه وتقولوا انكم اغلبيه وهذا حقيقي فعلا في معظم المناطق الا القليل جدا
ما عليكم الا تمسكوا مناطقكم وقراكم وحاراتكم وتحفظوا الامن فيها وانتم الاغلبيه ...
اما الزعيم لا تقلقوا عليه الحافظ هو الله وما هو ناقص رجال وحرس ومقاتلي ...
تشتوا مؤتمر قوي ...شدوا اموركم كل واحد في مكانه ومنطقته وكونوا اقوياء في انفسكم يقوى المؤتمر بكم اكثر من ماهو قوي الان.
